Toitū!

To view this page in English, click on the drop down box below the event title

Ko te kai a te rangatira he kōrero.

He toi tonu te reo Māori e tika ana kia whakamānawatia, kia whakanuia hoki. Kua eke te arohia o te reo Māori ki te tihi - he tokomaha rawa ngā tauira nō ngā pakeketanga katoa, nō ngā horopaki katoa, e tatari ana kia wātea mai he tūru i ngā karaehe; e whakaputahia ana anō he waiata rongonui ki te reo; e whakamāoritia ana he kiriata; e piki ana anō hoki te nui o ngā pukapuka e tāngia ana ki te reo.

Ki Toitū! whakahuihuia ai tētehi kāhui manukura nō te ao Māori kua whakaatu i ō rātou hiringa, i ō rātou tōngakingaki ki te whakarauoratanga, ki te ukauka, ki te whanaketanga hoki o te reo Māori. Ka noho ā rātou kōrero mō ō rātou wheako hei matapihi ki te ara e tū ai te tangata hei mumu reo i tēnei ao nei, i ēnei wā pāhekeheke.

He kaupapa tino rawe tēnei hei whakapiki i tō mōhiotanga ki te reo, ahakoa te wāhi e tū nā koe i tōu anō ara reo, e rongo kōrero ai hoki i tēnei kāhui mātanga reo, i a Tākuta Tā Tīmoti Kāretu (Te Panekiretanga o Te Reo, Te Kōhanga Reo National Trust), i a Ahorangi Rawinia Higgins (Te Toihau o Te Taura Whiri i te Reo Māori), i a Pānia Papa (Te Panekiretanga o Te Reo, Te Ahu o te Reo Māori) kua whakapau rā i ō rātou ngao i roto i ngā tau e kaha tonu ai te reo taketake o Aotearoa.

He kaupapa reorua tēnei